डीआईजी अर्जुन चन्दलाई १० दिन बिदा बस्न अनुमति

काठमाडौं । त्रिभुवन अन्तर्राष्ट्रिय विमानस्थलमा कार्यरत डीआईजी अर्जुन चन्दको राजीनामा अघि बढाउन प्रहरी प्रधान कार्यालयले आनाकानी गरेको छ । शुक्रबार प्रहरी नायव महानिरीक्षक चन्दले प्रहरी प्रधान कार्यालयमा राजीनामा पेस गरेका हुन् ।
चन्दले दिएको राजीनामाबारे ‘छलफल’ भइरहेको प्रहरी प्रधान कार्यालयका एक जना उच्च अधिकृतले रातोपाटीलाई बताए । आईजीपी बसन्त कुँवरसँग छलफल गरेपछि चन्दले बिदा लिएका छन् । डीआईजी चन्दले पेस गरेको १० दिनको बिदा आईजीपी कुँवरले स्वीकृत गरेका छन् ।
त्रिभुवन अन्तर्राष्ट्रिय विमानस्थलमा अध्यागमन अधिकृत र प्रहरी कर्मचारी बिचको विवाद छानबिन गर्न गठित समितिको सिफारिस प्रति डीआईजी चन्द असन्तुष्ट थिए । समितिले विवादमा संलग्न असईलाई निलम्बन र डिएसपी रेवतीरमण पोखरेलाई सचेत गराउन सिफारिस गरेको थियो ।