लमजुङमा बढ्न थाल्यो डेंगु संक्रमण

काठमाडौं । लमजुङमा डेंगु संक्रमण बढ्न थालेको छ । पछिल्लो तथ्यांक अनुसार जिल्लामा डेंगु संक्रमितको संख्या ५२ पुगेको छ । चालु आर्थिक वर्षको करिव २ महिनाको अवधिमा महिला २२ र पुरुष ३० जनामा डेंगुको संक्रमण देखिएको स्वास्थ्य कार्यालय लमजुङले जनाएको छ । चालु आर्थिक वर्षको पहिलो महिना ११ जनामा मात्रै संक्रमण देखिएको थियो ।
भदौ महिनाको २७ गते सम्मको तथ्याङ्क अनुसार ४१ जनामा जनामा संक्रमण देखिएको स्वास्थ्य कार्यालय लमजुङका भेक्टर कन्ट्रोल निरीक्षक यमराज बरालले बताए । पछिल्लो साता डेंगु संक्रमितको संख्या ह्वात्तै बढेको उनले बताए ।
पछिल्लो ४ दिनको अवधिमा बेसीशहरमा ३ जना पुरुष १ महिला गरि ४ जनामा डेंगुको संक्रमण देखिएको छ । जिल्लाका ८ पालिका मध्य बेसीशहर नगरपालिकामा डेंगु संक्रमितको संख्या धेरै रहेको पाइएको छ ।स्वास्थ्य कार्यालयको तथ्याङ्क अनुसार जिल्लाभरीका ५२ जना संक्रमित मध्य बेसीशहर नगरपालिकाका मात्रै २८ जना रहेका छन् ।