ढाका । बंगलादेशको ढाकामा जारी साफ यू–२० महिला फुटबल च्याम्पियनसिपमा नेपालले उत्कृष्ट लय कायम राख्दै उपाधिको बलियो दाबी पेश गरेको छ। शनिबार सम्पन्न खेलमा नेपालले भुटानलाई ८–० गोलअन्तरले पराजित गर्दै शिर्ष स्थानको होडमा प्रतिस्पर्धा चर्काएको हो।
यस जितसँगै नेपालले प्रतियोगितामा पाँच खेलमध्ये चारमा जित हासिल गर्दै १२ अंक बनाएको छ। नेपाल अब जुलाई २१ मा आयोजक बंगलादेशविरुद्ध अन्तिम खेल खेल्दैछ, जसको नतिजा उपाधि भाग्य निर्धारण गर्नेछ।
पूर्णिमा र मीना देउवाको निर्णायक योगदान
नेपालको जितमा पूर्णिमा राई र मीना देउवाले ह्याट्रिक गर्दै टिमको आक्रमणलाई धारिलो बनाइदिए। यस्तै कुसुम खतिवडा र समिक्षा मगरले एक–एक गोल थप्दै नेपालको गोल संख्या आठ पुर्याएका हुन्।
यसअघि नेपालले श्रीलंकालाई दुई खेलमा ७–०, भुटानलाई पहिलो भेटमा ६–१ ले हराइसकेको छ। बंगलादेशसँगको मात्र एक हार (३–२) बाहेक नेपाल शतप्रतिशत नतिजामा छ।
नेपालको उपाधि सम्भावना बलियो
चार राष्ट्र सहभागी प्रतियोगिता डबल राउन्ड रोबिन प्रणालीमा भइरहेको छ, जसमा सबै टिमले एक–अर्काविरुद्ध दुई पटक खेलिरहेका छन्। शीर्ष स्थानमा रहने टिम नै प्रतियोगिताको विजेता घोषित हुनेछ।
हाल अंकतालिकामा बंगलादेश र नेपालबीच प्रतिस्पर्धा तीव्र छ। नेपालले बंगलादेशविरुद्ध आगामी खेल जित्न सके उपाधि उचाल्ने बलियो सम्भावना रहनेछ।
