काठमाडौं । ओमानमा जारी आईसीसी टी–२० विश्वकप एसिया तथा पूर्वी एसिया–प्यासिफिक छनोटमा नेपालले शानदार प्रदर्शन गर्दै समूह ‘बी’को विजेता बनेको छ। शुक्रबार भएको समूह चरणको अन्तिम खेलमा नेपालले जापानलाई ५ विकेटले पराजित गर्दै सुपर सिक्समा प्रवेश गरेको हो।
टस हारेर पहिले ब्याटिङ गरेको जापानले २० ओभरमा ८ विकेट गुमाउँदै १३१ रन बनाएको थियो। जापानका कप्तान केन्डेल काडोवाकी–फ्लेमिङले ४६ बलमा ५ चौका र ३ छक्कासहित ६० रनको उत्कृष्ट पारी खेले। उनले इसम रहमानसँग दोस्रो विकेटका लागि ८६ रनको साझेदारी गरे। रहमानले २५ बलमा ३१ रन बनाए। तर मध्यक्रम ढल्किँदा जापानको स्कोर १३१ रनमै सीमित रह्यो।
जवाफमा नेपालले १८ ओभरमै ५ विकेट गुमाएर लक्ष्य पुरा गर्यो। ओपनर आसिफ शेखले ३८ रन, कुशल भुर्तेलले २१, कप्तान रोहित पौडेलले १८, सन्दीप जोराले ५ र कुशल मल्लले ४ रन बनाए। अन्त्यतिर दीपेन्द्र सिंह ऐरी (१४) र गुल्सन झा (२८)**ले अविजित रहँदै जित सुनिश्चित गरे।
बलिङमा जापानका शोमा स्लेटरले २ विकेट लिए भने रियो साकुरानो थोमस, सबाओरिस रविचन्द्रन र डिक्लान सुजुकीले १–१ विकेट हात पारे। नेपालतर्फ गुल्सन झा र सन्दीप लामिछानेले समान २–२ विकेट, सोमपाल कामी र नन्दन यादवले १–१ विकेट लिए।
यो जितसँगै नेपालले २ अंक बटुल्दै समूह ‘बी’को विजेता बनेको छ। अब नेपालले सुपर सिक्स चरणमा समूह ‘ए’ र ‘सी’का शीर्ष दुई टोलीसँग प्रतिस्पर्धा गर्नेछ। सुपर सिक्सको शीर्ष तीन स्थानमा पर्ने टोलीले २०२६ मा हुने टी–२० विश्वकपमा स्थान पाउनेछ।
