काठमाडौं । ओमानमा जारी आइसिसी टी-२० विश्वकप एसिया एन्ड इएपी छनोट अन्तर्गत नेपाल आज राति ८:४५ बजे कतारसँग खेल्दैछ। खेल ओमान क्रिकेट एकेडेमीमा हुने छ।
नेपालले शीर्ष-६ समूहको दोस्रो खेल खेल्दैछ। पहिलो खेलमा आइतबार नेपालले चिरपरिचित प्रतिद्वन्द्वी संयुक्त अरब इमिरेट्स (युएई) विरुद्ध रोमाञ्चक एक रनको जित निकाल्दै शानदार प्रदर्शन गरेको थियो।
नेपालले समूह चरणको अन्तिम खेलमा जापानलाई पराजित गर्दै शीर्ष-६ मा प्रवेश गर्दा २ अंक बटुलेको थियो। युएईविरुद्धको जितसँगै नेपालको खातामा ४ अंक पुगेको छ।
नेपालको विश्वकपमा छनोट हुने सम्भावना युएईविरुद्धको जितपछि अझ बलियो बनेको छ। शीर्ष स्थानमा रहेको ओमानसँग पनि ४ अंक छन्।
आगामी खेल तालिका
दोस्रो खेल: नेपाल vs कतार – सोमबार, राति ८:४५ बजे
तेस्रो खेल: नेपाल vs ओमान – बुधबार
अन्तिम खेल: नेपाल vs सामोआ – शुक्रबार
विश्वकप छनोटको सम्भावना
सुपर-६ का शीर्ष तीन टोलीले आगामी वर्ष फेब्रुअरी-मार्चमा भारत र श्रीलंकामा हुने आइसिसी टी-२० विश्वकप २०२६ मा स्थान सुनिश्चित गर्नेछन्।
यदि नेपाल शीर्ष तीनमा पर्छ भने नेपाली टोली लगातार दोस्रो पटक र समग्रमा तेस्रो पटक आइसिसी टी-२० विश्वकपमा छनोट हुनेछ।
नेपालका खेलप्रेमीहरू र समर्थकहरू टोलीलाई पूर्ण समर्थन गर्दै छन्। आजको खेलमा नेपालको प्रदर्शनले विश्वकप प्रवेशको बाटो अझ स्पष्ट बनाउन महत्वपूर्ण भूमिका खेल्नेछ।
