संयुक्त राज्य अमेरिका र इस्लामिक गणतन्त्र इरानले युद्ध अन्त्य गर्ने उद्देश्यसहित एक अस्थायी समझदारीपत्र (एमओयू) मा हस्ताक्षर गरेको दाबी गरिएको छ। इरानको सरकारी समाचार एजेन्सी आईआरएनएका अनुसार इरानी राष्ट्रपति मसूद पाज्गियान र अमेरिकी राष्ट्रपति डोनाल्ड ट्रम्पले बिहीबार बिहान उक्त सम्झौतामा हस्ताक्षर गरेका हुन्।
पहिले यो शान्ति सम्झौता शुक्रबार जेनेभा नजिकैको लुसर्नमा औपचारिक रूपमा हुने भनिए पनि एक दिन अगावै फ्रान्सको ऐतिहासिक भर्साइल्स दरबारमा हस्ताक्षर गरिएको बताइएको छ। फ्रान्सेली राष्ट्रपति इमानुएल म्याक्रोनले पनि सामाजिक सञ्जालमार्फत ट्रम्पले भर्साइल्स दरबारमा सम्झौतामा हस्ताक्षर गरेको भिडियो सार्वजनिक गरेका छन्।
आईआरएनएले सार्वजनिक गरेका तस्बिरहरूमा राष्ट्रपति पाज्गियानले दस्तावेजमा हस्ताक्षर गरिरहेको र राष्ट्रपति ट्रम्पले हस्ताक्षर भएका पृष्ठहरू देखाइरहेको देखिन्छ। इरानी अधिकारीहरूका अनुसार अब सम्झौताको कार्यान्वयन नै मुख्य परीक्षण हुने बताइएको छ।
उक्त समझदारीपत्रलाई “इस्लामाबाद समझदारीपत्र” नाम दिइएको छ, जसले लेबनानसहित विभिन्न मोर्चामा जारी सैन्य कारबाही तत्काल र स्थायी रूपमा अन्त्य गर्ने आह्वान गरेको छ। साथै होर्मुज जलडमरूमध्य पुनः सञ्चालन गर्ने तथा अमेरिकी नौसैनिक नाकाबन्दी अन्त्य गर्ने लक्ष्य राखिएको छ।
सम्झौताअनुसार अमेरिकाले ३० दिनभित्र इरानमाथि लगाएको नौसैनिक नाकाबन्दी हटाउने प्रतिबद्धता जनाएको छ। त्यसपछि ३० दिनभित्र आफ्ना सैन्य बलहरू इरान आसपासबाट फिर्ता गर्ने उल्लेख गरिएको छ।
यस अवधिमा समुद्री जहाजहरूको आवागमन युद्धअघिकै अवस्थामा पुनःस्थापित गरिने अपेक्षा गरिएको छ। साथै इरानले ६० दिनसम्म कुनै शुल्क नलिई व्यावसायिक जहाजहरूको सुरक्षित आवागमन सुनिश्चित गर्ने प्रयास गर्ने सहमति जनाएको बताइएको छ।
सम्झौतासँगै करिब ११० दिन लामो युद्ध अन्त्य भएको दाबी गरिएको छ, जुन २८ फेब्रुअरीमा अमेरिका र इजरायलले इरानमाथि पहिलो सैन्य आक्रमण गरेपछि सुरु भएको बताइन्छ।
