दोहा । कतारको रास लाफान औद्योगिक सहरस्थित एक ग्यास प्लान्टमा भीषण विस्फोट हुँदा कम्तीमा ५४ जना घाइते भएका छन् भने १८ जना बेपत्ता भएका छन्।
कतारका अधिकारीहरूका अनुसार उक्त प्लान्टमा आगलागी भएपछि ठूलो विस्फोट भएको हो। घटनापछि आगो नियन्त्रणमा ल्याइएको भए पनि खोज तथा उद्धार कार्य जारी रहेको बताइएको छ।
कतारको गृह मन्त्रालयले जारी गरेको विज्ञप्तिमा विस्फोट ‘प्राविधिक दुर्घटना’का कारण भएको उल्लेख गरिएको छ। मन्त्रालयले सार्वजनिक सुरक्षामा तत्काल ग्यास चुहावटको खतरा नरहेको पनि स्पष्ट पारेको छ।
मन्त्रालयका अनुसार कतार अन्तर्राष्ट्रिय खोज तथा उद्धार टोली र नागरिक सुरक्षा निकायहरूले बेपत्ता व्यक्तिहरूको खोजी गरिरहेका छन्।
विस्फोटबाट प्लान्टको उत्पादन तथा घरेलु ग्यास आपूर्तिमा कस्तो असर परेको छ भन्नेबारे स्पष्ट विवरण सार्वजनिक गरिएको छैन।
यसैबीच, प्रत्यक्षदर्शीहरूले रोयटर्सलाई बताएअनुसार विस्फोटको ठूलो आवाज राजधानी दोहा सम्म पनि सुनिएको थियो, जसले स्थानीय बासिन्दामा त्रास फैलाएको छ।
