मंगलबार गृहमन्त्री सुधन गुरुङसहित जल तथा मौसम विज्ञान विभाग पुगेका मन्त्री श्रेष्ठले सम्भावित जोखिमबारे जानकारी लिएपछि पूर्वतयारी र पूर्वसूचनामा एकीकृत रूपमा परिचालित हुन निर्देशन दिएका हुन्।
उनले प्रभावित हुनसक्ने क्षेत्रमा अहिले नै सूचना प्रवाह गर्न र सबै निकायबीच उच्च समन्वय कायम गर्न आग्रह गरे। राष्ट्रिय विपद् जोखिम न्यूनीकरण तथा व्यवस्थापन प्राधिकरणको नेतृत्वमा तीनै तहका सरकार र सुरक्षा निकायबीच समन्वय गरी पूर्वतयारी गर्नुपर्ने उनको भनाइ छ।
मन्त्री श्रेष्ठले कृषि, पर्यटन र यातायातलगायत सबै क्षेत्रलाई सतर्कता अपनाउन आग्रह गर्दै यात्रा गर्नुअघि मौसम तथा सडक अवस्थाबारे जानकारी लिन अपिल गरे।
सम्भावित क्षेत्रमा उद्धारकर्मी र सुरक्षाकर्मी तयारी अवस्थामा राखिएको उनले जानकारी दिए। भोटेकोशी बाढीबाट पाठ सिकेर यसपटक पूर्वतयारीमा विशेष ध्यान दिइएको उनको भनाइ छ।
गृहमन्त्री गुरुङले पनि सरकार आवश्यक पूर्वतयारीमा जुटिसकेको बताए। नदी तटीय क्षेत्रमा जनशक्ति परिचालन, नागरिकलाई पूर्वसूचना प्रवाह तथा उद्धार सामग्री तयारी अवस्थामा राखिएको उनले जानकारी दिए। उनले ट्रेकिङमा नजान र गइसकेकालाई सुरक्षित स्थानमा फर्किन आग्रह गरे।
जल तथा मौसम विज्ञान विभागका अधिकारीहरूले पश्चिमी न्यूनचापीय प्रणालीका कारण गण्डकी, लुम्बिनी र सुदूरपश्चिमका तराई भूभागमा भारीदेखि धेरै भारी वर्षाको सम्भावना रहेको जानकारी गराएका थिए।
