काठमाडौं । भिसाको उद्देश्यविपरीत कार्यमा संलग्न भएको आरोपमा २४ जना दक्षिण कोरियाली नागरिकलाई नेपालबाट निष्कासन गरिएको छ।
अध्यागमन विभागले उनीहरूको भिसा रद्द गर्दै प्रस्थान गरेको मितिदेखि तीन वर्षसम्म नेपाल प्रवेश गर्न नपाउने निर्णय गरेको हो।
विभागका अनुसार नेपाल बसाइ शंकास्पद देखिएको, आचरण संदिग्ध रहेको र प्राप्त भिसाको उद्देश्यविपरीत कार्य गरेको आरोपमा जिल्ला प्रशासन कार्यालय, मोरङले उनीहरूलाई अनुसन्धान तथा कारबाहीका लागि विभागमा उपस्थित गराएको थियो।
ती दक्षिण कोरियाली नागरिक मोरङको सुन्दरहरैँचा नगरपालिका–७ स्थित मालाती मार्गको ‘सुन्दर डाँडा’ क्षेत्रमा रहेको नेपाल न्यू कभनन्ट कलेज (एनएनसीसी) नामक शैक्षिक संस्थाको दीक्षान्त समारोह तथा धार्मिक कार्यक्रममा सहभागी भएका थिए।
पर्यटक भिसामा नेपाल आएका उनीहरू धार्मिक गतिविधिमा सहभागी भएको सूचना पाएपछि प्रहरीले पक्राउ गरेको विभागले जनाएको छ।
विभागका अनुसार उनीहरू सबैको भिसाको म्याद कायम नै थियो। तर, भिसाको उद्देश्यविपरीत कार्य गरेको ठहर गर्दै अध्यागमनसम्बन्धी विद्यमान कानुनअनुसार उनीहरूलाई जनही ५० हजार रुपैयाँ जरिवाना गरिएको छ।
विभागले बुधबार निर्णय गर्दै उनीहरूको भिसा रद्द गरी नेपालबाट निष्कासन गरेको हो। निर्णयअनुसार उनीहरूले प्रस्थान गरेको मितिदेखि तीन वर्षसम्म नेपाल प्रवेश गर्न पाउने छैनन्।
