बाटो नभएको ठाउँमा पुलः अख्तियारद्वारा ३ जना विरुद्ध भ्रष्टाचार मुद्दा

काठमाडौं । अख्तियार दुरुपयोग अनुसन्धान आयोगले बाटो नभएको ठाउँमा पुल बनाउने ३ जनाविरुद्ध भ्रष्टाचार मुद्दा दायर गरेको छ ।
गोरखा नगरपालिका–३ मा बाटो नभएको स्थानमा पुल बनाएर भ्रष्टाचार गरेको आरोपमा गण्डकी प्रदेशको भौतिक पूर्वाधार मन्त्रालयका तत्कालीन सचिव ईश्वरचन्द्र महरहट्टासहित ३ जनाविरुद्ध भ्रष्टाचार मुद्दा दायर गरिएको अख्तियारले जनाएको छ ।
अख्तियारले महरहट्टासहित भौतिक पूर्वाधार मन्त्रालय अन्तर्गतको प्रदेश सडक निर्देशनालयका तत्कालीन निमित्त निर्देशक रामकुमार श्रेष्ठ र पूर्वाधार विकास कार्यालय गोरखाका सिनियर डिभिजनल इन्जिनियर ओमराज ढुङ्गानाविरुद्ध मुद्दा दायर गरेको हो ।
गोरखा नगरपालिकाको जरेबरमा नारेश्वर जोड्ने पक्की पुल दुबैतर्फ सडक नभएको स्थानमा निर्माण गरिएको थियो । उनीहरुले ५ करोड ४५ लाख ५२ हजार रुपैयाँ भ्रष्टाचार गरेको अख्तियारको दाबी छ ।