विश्वकप छनोटबाट बाहिरियो नेपाल

काठमाडौं । आईसीसी एक दिवसीय विश्वकप क्रिकेट छनोटमा नेपाल सुपर सिक्स पुग्नबाट बन्चित भएको छ। शनिबार नेदरल्यान्ड्ससँग ७ विकेटले हारेसँगै नेपालको अबको विश्वकप यात्रामा पनि ब्रेक लागेको छ। नेपालले चार खेलमा एक खेलमात्र जितेको थियो। नेपालको फितलो ब्याटिङमा १६८ रनको झिनो लक्ष्य पाएको नेदरल्यान्ड्सले मात्र तीन विकेटको क्षतिमा लक्ष्य भेट्यो।
नेदल्यान्ड्सको दुई विकेट नेपालका सन्दिप लामिछानेले लिएका थिए। उनले विक्रमजित सिंह र वेस्ली बार्रेसीलाई आउट गरेका थिए। उनले ६० रन खर्चेर मात्र २ विकेट लिए। भने गुल्शन झाले एक विकेट लिए। अन्य बलरले विकेटको खाता खोल्न सकेनन्।
त्यसअघि सुरुमा ब्याटिङ गरेको नेपालको लागि कप्तान रोहित कुमार पौडेलले सर्वाधिक ३३ रन बनाए। सन्दिप लामिछानेले २७ रन, दिपेन्द्रसिंह ऐरीले १४ रन र कुशल मल्ल १२ रनमा आउट भए। त्यस्तै भिम सार्कीले २२ रन, ओपनर कुशल भूर्तेलले ७ रन र आरिफ शेखले २२ बनाए। आसिफ शेख शुन्यमा आउट भए। नेदरल्यान्ड्सका भानविकले सर्वाधिक ४ विकेट लिएका थिए। नेदरल्याण्ड्स सुपर सिक्समा पुगेको छ।