कालिका सहकारी प्रकरणः ३४ जनाविरुद्ध मुद्दा दायर

काठमाडौं । लमजुङको कालिका बचत तथा ऋण सहकारी संस्था लिमिटेडको रकम अपचलनको आरोपमा लमजुङ प्रहरीले पक्राउ गरेका ७ सहित ३४ जनाविरुद्ध जिल्ला अदालतमा मुद्दा दर्ता भएको छ ।
प्रहरीले अनुसन्धान गरेर मिसिल बुझाएको १ सातापछि सरकारी वकिलको कार्यालयले मंगलबार अदालतमा मुद्दा दर्ता गरेको हो । मंसिर १० गते ६ जना पक्राउ गरेको २४ औं दिनमा अदालतमा मुद्दा दर्ता भएको हो । कानुनतः पक्राउ गरिएको २५ औं दिनसम्म थुनछेक गरिसक्नुपर्नेछ ।
अदालतमा ३४ जनाविरुद्ध सहकारी ठगी शीर्षकमा मुद्दा दर्ता भएको र बयान शुरु भएको अदालतका स्रेस्तेदार भेषराज पौडेलले बताए । उनका अनुसार मंगलबार सहकारीका वर्तमान अध्यक्ष शिवराम सिलवालको बयान गरिएको छ । बाँकी ६ जनाको बुधबार बयान गरिने र त्यसपछि थुनछेक बहस हुने उनले बताए ।
सरकारी वकिल कार्यालय लमजुङका प्रमुख जिल्ला न्यायधिबक्ता पूर्णबहादुर थापा विदामा रहेपछि मुद्दा हेर्न गोरखा सरुवा भइसकेका सहायक जिल्ला न्यायधिवक्ता राजकुमार श्रेष्ठ लमजुङ आएका छन् । श्रेष्ठले अदालतमा ३४ जनाविरुद्ध मुद्दा दर्ता गरिएको बताए । उनले प्रहरीले पक्राउ विरुद्ध ७ जना र बाहिर रहेका २७ जनाविरुद्ध मुद्दा दर्ता गरिएको बताए ।