आयोगले भन्यो, ‘उपनिर्वाचनको आचारसंहिताले मन्त्रिपरिषद् विस्तार रोक्दैन’

काठमाडौं । उपनिर्वाचनका लागि लागू हुने निर्वाचन आचारसंहिताका कारण सरकार निर्माण र विस्तार प्रभावित नहुने भएको छ । निर्वाचन आयोगले वैशाख १० गते बारा–२, चितवन–२ र तनहुँ–१ मा प्रतिनिधिसभा सदस्यका लागि हुने उपनिर्वाचनका लागि शुक्रबारदेखि निर्वाचन आचारसंहिता लागू गर्ने निर्णय गरेको छ ।
तर, उपनिर्वाचनका लागि जारी भएको आचारसंहिताकै कारण मन्त्रिपरिषद् विस्तार, प्रदेशका सरकारहरू निर्माण र विस्तार लगायतका गतिविधि प्रभावित नहुने आयोगले जनाएको छ । आयोगले निर्वाचन हुने तीन जिल्लामा मात्रै लागू हुने गरी आचारसंहिता जारी गरेको हो ।
आयोगका प्रवक्ता शालिग्राम शर्मा पौडेलले निर्वाचन हुने तीन जिल्लाभर मात्रै आचारसंहिता विपरीतका गतिविधि गर्न नपाइने बताए । यसअघि राष्ट्रपति र उपराष्ट्रपति निर्वाचनका लागि जारी भएको आचारसंहिताका कारण सरकार विस्तार लगायतका कतिपय काम प्रभावित भएका थिए । आचारसंहिता अवधि सकिएलगत्तै ६ चैतमा प्रधानमन्त्री पुष्पकमल दाहालले विश्वासको मत लिए पनि बिहीबार अपराह्नसम्म मन्त्रिपरिषद्ले पूर्णता पाएको छैन । दलहरू आचारसंहिता लागू भएपछि मन्त्रिपरिषद् विस्तार गर्न मिल्ने वा नमिल्ने भन्ने अन्योलमा परिरहेका बेला आयोगले सम्बन्धित जिल्लामा मात्रै लागू हुने गरी आचारसंहिता लागू गरेको हो ।