चीनमा भूकम्प अपडेटः १ सय २७ जनाको मृत्यु

एजेन्सी । उत्तरपश्चिमी चीनको दुर्गम गाउँहरूमा उद्धारकर्मीहरूले चिसो अवस्थामा भत्किएका घरका भग्नावेशषबाट मङ्गलबार भूकम्पमा परी मृत्यु भएका एक सय २७ जनाको शव निकालेका छन्।
चिनियाँ अधिकारीका अनुसार गान्सु प्रान्तमा सोमबार मध्यराति ६.२ म्याग्निच्युडको भूकम्प गएको हो भने छिमेकी प्रान्त छिङहाइमा पनि धक्का महसुस भएको थियो।
भूकम्पमा परी मङ्गलबार दिउँसोसम्म कम्तीमा एक सय १३ जनाको मृत्यु र पाँच सय ३० जना घाइते भएको सरकारी सञ्चारमाध्यमले बताएका छन्। सरकारी समाचारपत्र पिपुल्स डेलीका अनुसार छिमेकी किङ्घाई प्रान्तको ह्याडोङमा थप १४ जनाको मृत्यु र एक सय ९८ जना घाइते भएका छन्।
सरकारी प्रसारक सिसिटिभीका अनुसार भूकम्पबाट एक लाख ५५ हजारभन्दा घेरै भवन क्षतिग्रस्त भएका छन् र बासिन्दाहरू सुरक्षाका लागि चिसो सडकमा भागेका थिए।