काठमाडौं । नेपाल प्रिमियर लिग एनपीएलको फ्रेन्चाइज टिम पोखरा एभेन्जर्सले समर्थकहरूका लागि नि:शुल्क टिकट र खाजासहित बस सेवा उपलब्ध गराउने भएको छ ।
पोखराको खेल भएको दिनमा टोलीले यो सेवा प्रदान गर्ने घोषणा गरेको हो । दुईवटा बससहित समर्थकहरू लिएर पोखराबाट काठमाडौं आउने र फेरि पोखरा लिएर जाने बताइएको छ । त्यस्तै फ्यानहरूका लागि नि:शुल्क टिकट, खाजा र जर्सी पनि उपलब्ध गराउने छ ।
यो सेवा लिनका लागि पोखराले आइतबार विहान ११ बजेदेखि साँझ ५ बजेसम्मलाई बुकिङ खुल्ला गरेको छ । पोखराभित्रबाट ४०जना र गण्डकी प्रदेशअन्तर्गत पोखराबाहिरबाट जान चाहनेहरूलाई पनि २० सिटको व्यवस्था गरिने छ ।
बुकिङका आधारमा काठमाडौं जाने व्यक्तिहरूको लक्की ड्र मार्फत नाम चयन गरिने छ । एकपटकमा नाम नआएमा अर्कोपटक प्राथमिकता दिइने जनाइएको छ ।
