काठमाडौं । जनकपुर बोल्ट्स काठमाडाैंमा जारी नेपाल प्रिमियर लिग (एनपीएल)को प्लेअफमा पुग्ने पहिलो टोली बनेको छ । त्रिवि मैदानमा बिहीबार भएको खेलमा काठमाडौं गुर्खाजलाई पाँच विकेटले पराजित गरेसँगै जनकपुरले लिग चरणको अन्तिम खेलअघि नै प्लेअफमा स्थान पक्का गरेको हो ।
आजको खेलमा पराजित भएसँगै काठमाडौंको प्लेअफ सम्भावना भने कठिन भएको छ । काठमाडौं पाँचमध्ये तीन खेलमा पराजित भएको छ । अब उसलाई प्लेअफमा पुग्न बाँकी दुवै खेल जित्नुपर्छ ।
आजको खेलमा काठमाडौंले दिएको १ सय २ रनको लक्ष्य जनकपुरले ५ विकेटको क्षतिमा १५.५ ओभरमा पूरा गरेको हो । टस जितेर पहिले ब्याटिङ गरेको काठमाडौं १९.३ ओभरमा १ सय १ रनमै अलआउट भएको थियो ।
