काठमाडौं । जारी एनपिएलमा पोखरा एभेन्जर्सले जनकपुर बोल्ट्सलाई पराजित गर्दै लगातार हारको श्रृंखला तोडेको छ। १५६ रनको लक्ष्य पछ्याउने क्रममा जनकपुरले ८ विकेट गुमाउँदै १३० रन मात्र बनाउन सक्दा पोखराले सानदार जित दर्ता गर्यो।
जनकपुरका वाने पार्नेलले ३८ बलमा अर्धशतक प्रहार गरे पनि टोलीलाई जित दिलाउन सकेनन्। उनी जारी लिगमा अर्धशतक बनाउने ११औँ खेलाडी बने। पार्नेलका अलावा सञ्जय कृष्णमूर्तीले २५, माज सदाकतले २० र ललित राजवंशीले १० रन जोडे। बाँकी खेलाडी दोहोरो अंक छुन सकेनन्।
पोखराका बलरमध्ये बिपिन खत्रीले ४ विकेट लिए भने सुमित महर्जनले २ विकेट हात पारे। कप्तान कुशल भुर्तेल र जिमी निसमले एक–एक विकेट जोडे।
यसअघि टस जितेर ब्याटिङ गरेको पोखराले ६ विकेट गुमाउँदै १५५ रनको प्रतिस्पर्धात्मक योगफल बनाएको थियो। टोलीका लागि सुमित महर्जनले सर्वाधिक ५० रन बनाए। दिनेश खरेलले ३८, त्रितराज दासले २९ र आडम रोसिङ्टनले २४ रन योगदान दिए।
जनकपुरतर्फबाट सञ्जय कृष्णमूर्तीले ३ विकेट लिन सफल भए। ललित राजवंशी र कप्तान अनिल साहले एक–एक विकेट लिए।
साविक विजेता जनकपुर र पोखरा दुवै टिम पहिलो दुई खेलमा पराजित भए पनि आजको खेलमा पोखराले आफ्नो लय फेला पार्न सफल भएको छ।
