काठमाडौं । नेपाल प्रिमियर लिग(एनपिएल) अन्तर्गत आजको खेलमा बलर चम्किँदा काठमाडौं गोर्खाजले चितवन राइनोजलाई सहजै हराएको छ। १४३ रनको लक्ष्य पछ्याएको चितवनको टोली काठमाडौंका बलरको उत्कृष्ठ प्रदर्शनअघि ८९ रनमा समेटियो। जसकारण काठमाडौंले ५३ रनको फराकिलो जित निकाल्यो।
यसअघि टस हारेर पहिले ब्याटिङमा उत्रिएको काठमाडौंले जोन सिम्पसनको अर्धशतकीय पारीको मद्दतले निर्धारित १९.४ बलमा अलआउट हुँदै १४२ रन जोडेको थियो। काठमाडौंको इनिङमा पनि चितवनका बलर सुरु देखि नै हाबी भएका थिए। मध्यक्रममा आएर सिम्पसनले ६० र मिलिन्द कुमारले ३८ रन बनाएर टिमलाई उकासेका थिए।
बलिङमा चितवनका सोहेल तनवीरले ४ विकेट, रञ्जित कुमार र कमलसिंह ऐरीले २–२ विकेट र रवि बोपाराले एक विकेट लिए।
१४३ रनको लक्ष्य पछ्याएको चितवनको इनिङ पनि सुरु देखि नै धर्मरायो। उसका लागि देव खनाल र रवि बोपाराले २१–२१ रन र सोहेल तनवीरले १८ रन जोड्नु सिवाय अन्य ब्याटरको प्रदर्शन निराशाजनक रह्यो।
काठमाडौंका लागि रसिद खानले ३, कप्तान करन केसी, मिलिन्द कुमार र शाहब आलमले २–२ विकेट लिए भने सन्तोष यादवको खातामा एक विकेट गयो।
यो जितसँगै काठमाडौं गोर्खाज ६ अंक सहित अंक तालिकाको तेस्रो स्थानमा पुगेको छ। ५ खेल जितेको काठमाडौंका लागि यो तेस्रो जित हो। ४ खेल खेलेको चितवन भने दुई हार र दुई जितसहित ४ अंक लिएर अंक तालिकाको चौथो स्थानमा छ।
