काठमाडौं । फागुन २१ गते हुने प्रतिनिधि सभा निर्वाचनका लागि आज मध्यराति १२ बजेदेखि मौन अवधि सुरु हुँदैछ।
निर्वाचनलाई स्वच्छ, निष्पक्ष र भयरहित वातावरणमा सम्पन्न गर्न मतदान नसकिएसम्म यो अवधि लागू रहनेछ। मौन अवधि सुरु हुनुभन्दा अगाडि आज राजनीतिक दल र उम्मेदवारहरू चुनावी सभा तथा अन्तिम प्रचारप्रसारमा निकै व्यस्त देखिएका छन्।
मौन अवधिको मुख्य उद्देश्य मतदातालाई शान्त वातावरणमा सोच्ने समय दिनु र उम्मेदवारहरूबीच हुन सक्ने सम्भावित झडप वा विवादलाई रोक्नु हो।
अन्तर्राष्ट्रिय प्रचलन अनुसार, मतदानको अघिल्लो समयमा दलहरूले मतदातालाई अनुचित प्रभावमा नपारुन् र मतदाताहरू कुनै पनि त्रास बिना मतदान केन्द्रसम्म पुग्न सकून् भन्ने सुनिश्चित गरिन्छ। निर्वाचन आचारसंहिता अनुसार यस अवधिमा प्रचारप्रसारका सम्पूर्ण गतिविधिहरू पूर्णतः बन्द गर्नुपर्ने हुन्छ।
निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीका अनुसार, मौन अवधिमा कुनै पनि प्रकारका सभा, सम्मेलन, गोष्ठी, कार्यशाला वा अन्तर्क्रिया गर्न पाइने छैन।
साथै, भौतिक रूपमा मात्र नभई सामाजिक सञ्जाल, अनलाइन वा छापा माध्यमबाट समेत कसैको पक्ष वा विपक्षमा मत माग्न, सन्देश पठाउन वा प्रचार सामग्री सेयर गर्न कडा प्रतिबन्ध लगाइएको छ।
आचारसंहिता पालना गराउन निर्वाचन अधिकृतको कार्यालयले मतदान केन्द्रको ३ सय मिटर वरिपरि रहेका सबै प्रकारका प्रचार सामग्रीहरू हटाउन निर्देशन दिएको छ।
यदि कसैले यस अवधिको उल्लंघन गरी प्रचारप्रसार गरेमा वा मतदातालाई प्रभावित पार्ने गतिविधि गरेमा निर्वाचन ऐन र आचारसंहिता बमोजिम कारबाही गरिने आयोगले स्पष्ट पारेको छ।
