काठमाडौं । स्मार्ट टेलिकमका सञ्चालक सर्वेश जोशीलाई पक्राउ परेका छन् । नेपाल प्रहरीको केन्द्रीय अनुसन्धान ब्यूरो (सीआईबी) ले जोशीलाई ठगी तथा आपराधिक विश्वासघात सम्बन्धी आरोपमा काठमाण्डौबाट वैशाख २१ गते पक्राउ गरेको हो। उनलाई अदालतको अनुमति लिएर पक्राउ गरिएको र हाल अनुसन्धानको चरणमा रहेको प्रहरीले जनाएको छ।
स्मार्ट टेलिकम प्रालिले नेपाल दूरसञ्चार प्राधिकरण बाट २०७० सालमा आधारभूत टेलिफोन सेवा सञ्चालनको अनुमतिपत्र लिएको थियो। तर, नियमानुसार समयमै नवीकरण नगरेपछि कम्पनीको लाइसेन्स दूरसञ्चार ऐन, २०५३ अनुसार २०८० वैशाख ३ गतेदेखि स्वतः रद्द भएको थियो।
लाइसेन्स रद्द भएसँगै कम्पनीका सम्पूर्ण पूर्वाधार, सञ्जाल र सम्पत्ति प्राधिकरणको नियन्त्रणमा गएको थियो। यद्यपि, अनुसन्धान अनुसार ती सम्पत्तिमा अनधिकृत हस्तक्षेप भएको आशंका गरिएको छ।
