खार्तुम । सुडानको डार्फर क्षेत्रमा रहेको एक नागरिक अदालतमा भएको ड्रोन आक्रमणमा कम्तीमा ३५ जनाको मृत्यु भएको मानवअधिकार समूहले जनाएको छ।
सुडानमा मानवअधिकार उल्लंघनका घटनाको अभिलेखीकरण गर्दै आएको स्वतन्त्र संस्था इमर्जेन्सी लयर्सका अनुसार आइतबार उत्तरी डार्फर राज्यको अल–जाविया गारा गाउँस्थित नागरिक अदालतको मुख्यालयमा ड्रोन आक्रमण गरिएको थियो। उक्त अदालतले स्थानीय समुदायका लागि न्यायिक तथा सामाजिक सेवा प्रदान गर्दै आएको बताइएको छ।
संस्थाले घटनाको स्वतन्त्र अनुसन्धानको माग गर्दै नागरिक तथा सार्वजनिक संस्थामाथि गरिएको आक्रमणलाई अन्तर्राष्ट्रिय मानवीय कानुनको गम्भीर उल्लंघन भएको जनाएको छ।
सन् २०२३ अप्रिलदेखि सुडानमा सरकारी सेना र अर्धसैनिक र्यापिड सपोर्ट फोर्सेस (आरएसएफ) बीच जारी गृहयुद्धका कारण देश गम्भीर मानवीय संकटमा परेको छ।
द्वन्द्व अनुगमन संस्था एसीएलईडीका अनुसार युद्ध सुरु भएयता कम्तीमा ५९ हजार मानिसको मृत्यु भइसकेको छ। यद्यपि सहायता संस्थाहरूले वास्तविक मृतक संख्या यसभन्दा धेरै बढी हुन सक्ने बताएका छन्।
संयुक्त राष्ट्रसंघका अनुसार ड्रोन आक्रमण सुडानको युद्धको प्रमुख रणनीतिमध्ये एक बनेको छ। सन् २०२६ को पहिलो चार महिनामा मात्रै युद्धका कारण भएका नागरिक मृत्युमध्ये ८० प्रतिशत घटनाका लागि सशस्त्र द्वन्द्व जिम्मेवार रहेको राष्ट्रसंघले जनाएको छ।
घटनाबारे प्रतिक्रिया माग्दा सुडानी सेनाले कुनै आधिकारिक टिप्पणी नगरेको अन्तर्राष्ट्रिय सञ्चारमाध्यमहरूले जनाएका छन्।
