सुनकोशी गाउँपालिकाका अध्यक्ष कमल तामाङले एक वर्षको तलब विद्यालयलाई दिने

काठमाडौं । ओखलढुंगाको सुनकोशी गाउँपालिकाका अध्यक्ष कमल तामाङले आफुले पाएको एक वर्षको तलब सुविधा बापतको रकम पालिकाका विद्यालयलाई सहयोग गर्ने भएका छन् ।
गाउँपालिकामा आयोजित सुनकोशी गाउँपालिकाको एक वर्षे वार्षिक कार्यप्रगति विवरण सार्वजनिक तथा पत्रकार सम्मेलनमा उनले सो घोषणा गरेका हुन् ।
अध्यक्ष तामाङले मासिक रुपमा ४४ हजार रुपैयाँ बराबरको सेवा सुविधा पाउँदै आएका छन् । जसबाट प्रति महिना १० हजार बराबरको रकम गाडी भाडामा खर्च भएको र बाँकी रहेको प्रति महिनाको ३४ हजारका दरले हुने १२ महिनाको ४ लाख ८ हजार रुपैयाँ पालिकाका विभिन्न विद्यालयलाई सहयोग गर्ने बताएका छन् ।
पालिकाका ४ वटा सामुदायिक विद्यालयलाई प्रति विद्यालय १ लाख २ हजारका दरले हस्तान्तरण गरिने अध्यक्ष तामाङले बताए । फर्निचर निर्माणलगायतका कार्यको लागि रकम पाउने विद्यालयहरुमा कालिका आवि मुलखर्क, कालिका मावि कोषभञ्ज्याङ्ग, कुशादेवी मावि कटुञ्जे र जगत जननी मावि मानेडाँडा रहेका छन्् ।