काठमाडौं । सरकारले विश्व अर्थतन्त्रमै मन्दी आउँदा नेपालको आर्थिक क्षेत्र पनि सुस्ताएको दाबी गरेको छ । अर्थमन्त्री डाक्टर प्रकाशशरण महतले आज आइतवार प्रतिनिधि सभामा प्रस्तुत गरेको चालु आर्थिक वर्षको आर्थिक सर्वेक्षणमा कोभिड महामारी र रुस–युक्रेन युद्धका कारण विश्वको समग्र आर्थिक वृद्धिदर २ दशमलव ८ प्रतिशतमा सीमित हुने उल्लेख गरेका हुन् ।
नेपालमा चालु आर्थिक वर्षका लागि सरकारले ८ प्रतिशतको आर्थिक वृद्धिदरको लक्ष्य राखेकोमा जम्मा २ दशमलव १६ प्रतिशतमा सीमित हुने देखिएको अर्थमन्त्री महतले बताए ।
यस्तै कुल उपभोग पनि कुल गार्हस्थ्य उत्पादनको तुलनामा जम्मा ९३ दशमलव ६ प्रतिशतमा सीमित रहने र लगानी ५ प्रतिशतले घटेर १७ खर्ब ५४ अर्ब रुपैयाँ रहने आर्थिक सर्वेक्षणमा उल्लेख छ । यस्तै प्रतिव्यक्ति कुल गार्हस्थ्य उत्पादन अर्थात् जीडीपी ८ दशमलव १ प्रतिशतले बढेर १ लाख ८२ हजार ६ सय ८३ रुपैयाँ अर्थात् १३ सय ९९ सय अमेरिकी डलर पुग्ने अनुमान छ । प्रतिव्यक्ति कुल राष्ट्रिय आय १४ सय १० अमेरिकी डलर र प्रतिव्यक्ति कुल राष्ट्रिय खर्चयोग्य आय १७ सय ५२ अमेरिकी डलर रहने सर्वेक्षणमा उल्लेख छ ।
