चिसंखु स्वास्थ्य चौकीमा निःशुल्क अल्ट्रासाउन्ड सेवा

काठमाडौं । लमजुङको मध्यनेपाल नगरपालिका वडा नं. ७ स्थित चिसंखु स्वास्थ्य चौकीमा निःशुल्क ग्रामीण अल्ट्रासाउन्ड सेवा सुचारु भएको छ । मध्यनेपाल नगरपालिको स्वास्थ्य चौकीलाई अल्ट्रासाउन्ड मेसिन उपलव्ध गराएसँगै अल्ट्रासाउन्ड सेवा शुरु भएको हो । गर्भवती महिलाहरुलाई गाउँघरमै सहज रुपमा स्वास्थ्य सेवा उपलव्ध गराउने उदेश्यले नगरपालिकाले आमा सुरक्षा कार्यक्रम अन्तर्गत अल्ट्रासाउन्ड मेसिन खरिद गरी स्वास्थ्य चौकीलाई हस्तान्तरण गरेको हो ।
शुक्रबार एक कार्यक्रमकाबीच नगरप्रमुख रमेश पाण्डेले स्वास्थ्य चौकीमा कार्यरत स्टार्फ नर्स निशा राईलाई अल्ट्रासाउन्ड मेसिन हस्तान्तरण गरे । ग्रामीण क्षेत्रमा रहेका गर्भवती महिलाहरुको स्वास्थ्य अवस्थालाई लक्षित गरि सेवा विस्तारका क्रममा नगरपालिका आफैले लगानी गरी निःशुल्क रुपमा अल्ट्रासाउन्ड सेवा सुरु गरेको नगरप्रमुख पाण्डेले बताए ।