टस जितेर पहिले बलिङ रोजेको विराटनगरविरुद्ध चितवनले निर्धारित ओभरमा ३ विकेट गुमाएर १५७ रन बनाएको थियो। चितवनका लागि इङ्ल्यान्डका ब्याटर डाविड मलानले सर्वाधिक ७० रन बनाए। उनले ५० बलमा ५ चौका र ५ छक्का प्रहार गरे। आन्द्रे रसेलको बलमा आउट हुनुअघि मलानले टोलीलाई बलियो योगफलतर्फ अघि बढाएका थिए।
त्यस्तै, रवि बोपाराले ३२ र डीआर मौस्लीले २९ रनको योगदान दिए। देव खनालले १२ तथा अर्जुन साउदले ३ रन बनाए। विराटनगरका लागि चरिथ असलंका, एन्जेलो म्याथ्युज र आन्द्रे रसेलले एक–एक विकेट लिए।
१५८ रनको लक्ष्य पछ्याएको विराटनगरले सुरुवातमा राम्रो प्रदर्शन गरेको थियो। ओपनर लोकेश बमले १४ बलमा २६ रन बनाउँदै टोलीलाई आक्रामक सुरुवात दिलाए। उनले ४ चौका र १ छक्का प्रहार गरे। रन्जित कुमारको बलमा विवेक यादवबाट क्याच आउट हुनुअघि बमले विराटनगरलाई जितको लयमा अघि बढाएका थिए।
अर्का ओपनर इमरान शेखले ३१ बलमा ३९ रन बनाए। त्यस्तै, वेस्ट इन्डिजका अलराउन्डर आन्द्रे रसेलले आक्रामक ब्याटिङ गर्दै १७ बलमा ३३ रन जोडे। उनले ४ छक्का र १ चौका प्रहार गरे।
रसेल आउट हुँदा विराटनगरलाई २५ बलमा २६ रन आवश्यक थियो। तर, त्यसपछि विराटनगरले लगातार विकेट गुमायो। कमल सिंह ऐरीको बलमा देव खनालबाट क्याच आउट भएका रसेलको विकेट खेलको निर्णायक मोड बन्यो।
विराटनगरका बसिर अहमदले १३ बलमा १३ रन बनाए। चरिथ असलंका ८, एन्जेलो म्याथ्युज १४ र शुभम रन्जनेले १० रन जोडे। रुपेश सिंह, प्रतिश जिसी र सन्दीप लामिछानेले भने खाता खोल्न सकेनन्। अन्ततः विराटनगरले लक्ष्य पूरा गर्न नसक्दा चितवनलाई ८ रनको जित सुम्पियो।
चितवनको जितमा कमल सिंह ऐरीले उत्कृष्ट बलिङ गरे। उनले ४ ओभरमा २६ रन खर्चेर ४ विकेट लिए। रिजन ढकालले २ विकेट हात पारे भने रन्जित कुमारले १ विकेट लिए। रन्जितले ४ ओभरमा १५ रन मात्रै खर्चिएर किफायती बलिङ गरे। टम टेलरले पनि १ विकेट लिए।
यस जितसँगै चितवन राइनोजले एनपीएलमा महत्वपूर्ण २ अंक जोडेको छ। आक्रामक ब्याटिङका बाबजुद अन्तिम ओभरहरूमा सम्हालिन नसक्दा विराटनगर किंग्सले भने जितको अवसर गुमाएको छ।
