मुख्यसचिव अर्यालले सार्वजनिक गरे २५ बुँदे प्राथमिकता

काठमाडौं । नवनियुक्त मुख्यसचिव सुमनराज अर्यालले आफ्नो कार्यकालका २५ बुँदे प्राथमिकता सार्वजनिक गरेका छन्। उनी प्रमुख प्राथमिकतामा २१ फागुनमा हुने प्रतिनिधिसभा सदस्य निर्वाचनलाई राखेका छन्।

मुख्यसचिव अर्यालले भ्रष्टाचारमुक्त र सुशासनयुक्त प्रशासन कायम गर्न दोस्रो प्राथमिकता राखेका छन्। उनले आफ्ना पदबहालीको अवसरमा विभिन्न मन्त्रालयका सचिव तथा कर्मचारीलाई सम्बोधन गर्दै यी प्राथमिकताबारे जानकारी दिएका हुन्।

उनका अनुसार २१ फागुनको निर्वाचन स्वतन्त्र, निष्पक्ष र धाँधलीरहित वातावरणमा सम्पन्न गराउन पहिलो प्राथमिकता हुनेछ। सिंगो मुलुकको मुख्य ध्यान निर्वाचनमा रहेको हुँदा निजामती प्रशासनको प्राथमिकता पनि यही रहेको उनले स्पष्ट पारे।

निर्वाचन व्यवस्थापनका लागि निजामती सेवा, नेपाली सेना, नेपाल प्रहरी, सशस्त्र प्रहरी बल र राष्ट्रिय अनुसन्धान विभागसहित सुरक्षासम्बन्धी सबै मन्त्रालय र निकायबीच उचित समन्वय र सुदृढ कार्यात्मक सम्बन्ध कायम गर्न उनी प्रतिबद्ध रहने बताए।

मुख्यसचिव अर्यालले प्रतिनिधिसभा निर्वाचनसँगै भ्रष्टाचारमुक्त, सुशासनयुक्त शासन व्यवस्था कायम गर्ने सरकारको अर्को प्रमुख कार्यभार भएको पनि बताए। उनी भन्छन्, “सरकारका काँधमा रहेका यी दुई महत्वपूर्ण जिम्मेवारी पूरा गर्न प्रशासन यन्त्रले पूर्ण सहयोग र सक्रिय भूमिका निर्वाह गर्न आवश्यक छ।”

उनले २३ र २४ भदौको आन्दोलनमा जेनजि पुस्ताले मागेको उत्तरदायी र पारदर्शी शासनलाई ध्यानमा राख्दै निजामती सेवा जनउत्तरदायी, सदाचारयुक्त र आधुनिक प्रविधिमा आधारित नतिजामुखी प्रणालीको रूपमा स्थापित गर्न नेतृत्व तहमा काम गर्ने प्रतिबद्धता जनाएका छन्।