काठमाडौं । यस वर्षको नुरगंगा राष्ट्रिय गायन पुरस्कार लोकगायक राजु परियारलाई प्रदान गरिने भएको छ । नुरगंगा प्रतिभा पुरस्कार गुठीले एक लाख रुपैयाँ राशिको उक्त पुरस्कार गायक परियारलाई प्रदान गर्ने निर्णय गरेको हो ।
गुठीका सदस्यसचिव यज्ञप्रसाद शर्मा पोखरेलका अनुसार गुठीले ३० हजार राशिको क्षेत्रीय साहित्य पुरस्कार पाल्पाका साहित्यकार रामबहादुर पहाडीलाई, २५ हजारको राष्ट्रिय नवप्रतिभा बाल साहित्य पुरस्कार मोरङका सोइना दाहाललाई र २० हजार राशिको क्षेत्रीय नवप्रतिभा गायन पुरस्कार अर्घाखाँचीका कुशल बेल्वासेलाई प्रदान गर्ने निर्णय गरेको छ । पुरस्कार आगामी जेठ ११ गते प्रदान गरिने पोखरेलले बताए ।
