राष्ट्रपतिले बोलाएको सर्वदलीय बैठक बस्दै

काठमाडौं । राष्ट्रपति रामचन्द्र पौडेलले संसद्‌को गतिरोध अन्त्य गर्ने र समसामयिक राजनितिक विषयबारे छलफल गर्न बोलाएको सर्वदलीय बैठक आज बस्दै छ।
संसद्मा प्रतिनिधित्व गर्ने सबै राजनीतिक दलका शीर्ष नेतासँग राष्ट्रपति पौडेलले आज छलफल गर्न लागेका हुन्। छलफल बिहान साढे ८ बजे शीतलनिवासमा बोलाइएको छ। बैठकमा सदन सुचारु गर्नेबारे र समसामायिक राजनितिक विषयमा छलफल हुने छ।
राष्ट्रपति पौडेलले पछिल्लो समय सदनमा भएको अवरोधबारे चासो लिँदै आएका छन्। उनले सदनको अवरोध हटाउन प्रधानमन्त्री पुष्पकमल दाहाल र प्रमुख प्रतिपक्षी दल नेकपा एमालेका अध्यक्ष केपी शर्मा ओलीसँग समेत पटक-पटक छलफल गरिसकेका छन्। प्रमुख प्रतिपक्षी दल ले साउन १० गतेयता संसद् अवरोध गर्दै आएको छ । विमानस्थलबाट बाहिरिदै गरेको ६० किलो सुन प्रकरणमा एमालेले उच्चस्तरीय छानबिन समितिमार्फत अनुसन्धान हुनुपर्ने अडान राख्दै आएको छ।