काठमाडौं । सरकारले विभिन्न नौवटा विधेयक संघीय संसदमा पेस गर्ने निर्णय गरेको छ। बुधबार बसेको मन्त्रिपरिषद् बैठकले संवैधानिक, आर्थिक, सहकारी, श्रम, राहदानी, वायुसेवा तथा मानव बेचबिखनलगायत विभिन्न क्षेत्रसँग सम्बन्धित विधेयक संसदमा दर्ता गर्न स्वीकृति दिएको हो।
सरकारका प्रवक्ता सस्मित पोखरेलका अनुसार बैठकले संवैधानिक निकायका पदाधिकारीहरूको पारिश्रमिक, सेवाको शर्त र सुविधासम्बन्धी ऐन संशोधन, खानी तथा खनिज पदार्थसम्बन्धी नयाँ कानुन, सङ्क्रामक पशु रोग नियन्त्रण, राहदानी ऐन संशोधन, मानव बेचबिखन तथा ओसारपसार नियन्त्रण (पहिलो संशोधन), बालश्रम (निषेध तथा नियमित गर्ने), आन्तरिक वायुसेवाको दायित्वसम्बन्धी व्यवस्था, मेलमिलाप ऐन संशोधन तथा कर्मचारी सञ्चयकोष ऐन संशोधन सम्बन्धी विधेयक संसदमा पेस गर्न स्वीकृति दिएको हो।
बैठकले सम्पत्ति शुद्धीकरण अनुसन्धान विभागका महानिर्देशक वा निजले तोकेको अधिकृतलाई विदेशी विनिमयसम्बन्धी कसुरको अनुसन्धान अधिकारी तोक्ने निर्णय पनि गरेको छ। यस निर्णयले विदेशी मुद्रा कारोबारसँग सम्बन्धित कसुरको अनुसन्धान प्रक्रियालाई थप प्रभावकारी बनाउने अपेक्षा गरिएको छ।
यस्तै, मन्त्रिपरिषद्ले समस्याग्रस्त सहकारी व्यवस्थापन समितिको सदस्यमा सिन्धुलीका खेटराज दाहाललाई मनोनयन गर्ने निर्णय गरेको छ। सहकारी क्षेत्रमा देखिएका समस्या समाधानका लागि समितिको भूमिकालाई थप सुदृढ बनाउने उद्देश्यले उक्त नियुक्ति गरिएको जनाइएको छ।
बैठकले प्राविधिक शिक्षा तथा व्यावसायिक तालिम परिषद् (छैटौं संशोधन) नियमावली, २०८३ पनि स्वीकृत गरेको छ। यसले प्राविधिक तथा व्यावसायिक शिक्षाको व्यवस्थापन र सञ्चालनलाई समयानुकूल बनाउन सहयोग पुग्ने सरकारको अपेक्षा छ।
सरकारले यी निर्णयमार्फत कानुनी सुधार, प्रशासनिक दक्षता, वित्तीय अनुशासन तथा सार्वजनिक सेवा प्रवाहलाई थप प्रभावकारी बनाउने लक्ष्य लिएको जनाएको छ। संसदबाट विधेयक पारित भएपछि सम्बन्धित क्षेत्रमा नयाँ कानुनी व्यवस्था लागू हुनेछन्।
