काठमाडौं । हमासद्वारा इजरायलमा मारिएका विपिन जोशीको शव भोलि नेपाली ल्याउने तयारी भइरहेको छ ।
परराष्ट्र मन्त्रालय त्यसको तयारीमा जुटेको छ । परराष्ट्र मन्त्रालयका अनुसार विपिनको शव सोमबार साढे २ बजे नेपाल आइपुग्नेछ । उनको शव नेपाल आएपछि सरकारको तर्फबाट श्रद्धाञ्जलि कार्यक्रम गरिने छ ।
‘लर्न एन्ड अर्न’ कार्यक्रमअन्तर्गत विपिन जोशी इजरायल गएका थिए । सन् २०२३ अक्टोबर ७ मा हमासले इजराइलमाथि आक्रमण गर्दा विपिन हमासको कब्जामा परेका थिए, जहाँ १० नेपालीको ज्यान गएको थियो । ती १० नेपालीको शव त्यतिबेलै नेपाल ल्याइएको थियो । विपिन हमासको कब्जामा रहेको थाहा पाएपछि रिहाइका लागि नेपालले निकै प्रयास गरेको थियो ।
हमास समूहले इजरायललाई विपिनको शव हस्तान्तरण गरेपछि त्यसको डीएनएलगायत अन्य परीक्षणमार्फत उनी नै रहेको पुष्टि भएपछि इजरायलबाट शव ल्याउने प्रक्रिया सुरु गरेको हो ।
