काठमाडौं । प्रधानमन्त्री सुशीला कार्कीले नेपाली सेनाको मुख्यालय जंगी अड्डाको निरीक्षण भ्रमण गरी आगामी फागुन २१ गते हुने प्रतिनिधि सभा सदस्य निर्वाचनका लागि सेनाले गरेका तयारीबारे जानकारी लिएकी छन्।
सेनाले हालको सुरक्षा अवस्था, चुनौती र आगामी योजनाबारे प्रधानमन्त्रीलाई ब्रिफिङ गरेको थियो। साथै निर्वाचन सुरक्षामा सेनाको परिचालन योजना पनि प्रस्तुत गरिएको थियो। प्रधानमन्त्री कार्कीले निर्वाचनलाई स्वतन्त्र, निष्पक्ष र भयरहित बनाउन सरकार प्रतिबद्ध रहेको बताउँदै सेनाले पाएको जिम्मेवारी सफलतापूर्वक पूरा गर्ने विश्वास व्यक्त गरिन्।
उनले सुरक्षाबारे स्पष्ट कार्ययोजनासहित अघि बढ्न, मतदाताको सुरक्षामा कुनै त्रुटि नहोस् भनेर ध्यान दिन तथा जेनजी आन्दोलनका क्रममा हराइएका हातहतियारको खोजी–नियन्त्रणमा सुरक्षा निकायबीच सहकार्य बढाउन निर्देशन दिइन्।
निरीक्षण कार्यक्रममा गृहमन्त्री ओमप्रकाश अर्याल, कानुनमन्त्री अनिलकुमार सिन्हा, मुख्यसचिव सुमनराज अर्याल र प्रधान सेनापति अशोकराज सिग्देललगायत अधिकारी सहभागी थिए।
