काठमाडौं । मंसिर १६ गते तय भएको स्थानीय तह उपनिर्वाचनका लागि निर्वाचन आयोगले ३७६ जना उम्मेदवारको अन्तिम सूची सार्वजनिक गरेको छ ।
जिल्ला समन्वय समिति प्रमुख, नगरपालिका प्रमुख, उपप्रमुख र वडा अध्यक्ष तथा गाउँपालिका अध्यक्ष, उपाध्यक्ष र वडा अध्यक्षका रिक्त ४४ पदमा राजनीतिक दलबाट २८९ जना र १२१ जना स्वतन्त्र उम्मेदवार गरी जम्मा ४१० जनाको मनोनयन पत्र दर्ता भएकोमा ३१ जनाले उम्मेदवारी फिर्ता लिएको प्रमुख निर्वाचन आयुक्त दिनेश थपलियाले जानकारी दिए ।
जसअनुसार ओखलढुङ्गा र कैलाली जिल्लाको जिल्ला समन्वय समिति प्रमुखमा क्रमशः कांग्रेसका उम्मेदवार टेकराज भट्टराई र टीका कुमारी चौधरी (भुल) निर्विरोध निर्वाचित भएकी छन् ।
यस्तै रुकुम (पूर्वी भाग) स्थित पुथा उत्तरगंगा गाउँपालिका वडा नम्बर २ को वडा अध्यक्षमा माओवादीका उम्मेदवार जगत घर्ती निर्विरोध निर्वाचित भएका छन् ।
निर्विरोध निर्वाचन सम्पन्न भएका तीन स्थान बाहेक ४१ स्थानका विभिन्न पदहरूमा २० राजनीतिक दल र स्वतन्त्र उम्मेदवार समेत ३७६ जना उम्मेदवारलाई सम्बन्धित मुख्य निर्वाचन अधिकृत तथा निर्वाचित अधिकृतबाट निर्वाचन चिह्न प्रदान गरिएको आयोगले जनाएको छ ।
