काठमाडौं । काठमाडौंको टोखास्थित झोरमा ट्रकभित्र भेटिएको २५ करोड बराबरको डलर र युरोको मालिक सिन्धुपाल्चोकको भोटेकोशी गाउँपालिका–४ घर भएका नारायण पौडेल रहेको अनुसन्धानबाट खुलेको छ ।
राजश्व अनुसन्धान विभागले दुई साता लामो अनुसन्धानमा पौडेलको संलग्नता खुलेपछि उनलाई पक्राउ गर्न अदालतबाट पक्राउ पूर्जी मागिसकेको छ । पौडेल लामो समयदेखि टोखामा बस्दै आएका थिए ।
गत चैत ४ गते राति ना ७ ख १६५२ नम्बरको ट्रकमा लुकाएर रकम रसुवातर्फ लाँदै गरेको अवस्थामा प्रहरीले सिन्धुपाल्चोकका ४३ वर्षीय कुसान लामालाई पक्राउ गरेको थियो । उनी ट्रक चालक हुन् ।
लामाले ट्रकमा फल्स बटम बनाएर अमेरिकन डलर र युरो लुकाएर लैजाँदै थिए । विभागका एक अनुसन्धान अधिकृतका अनुसार उक्त रकम पौडेलले दिएको खुलेको छ ।
विभागले लामाको मोबाइल डीएफएल गरेर हेर्दा उनले अन्तिम पटक पौडेललाई नै कल गरेको देखिन्छ । स्रोतका अनुसार विभागले प्रहरीलाई पत्राचार गरी पौडेललाई पक्राउ गरेर बुझाउन भनेको छ ।
विभागले उक्त ट्रकको फल्स बटम बनाइएको ग्यारेज, पार्किङस्थल र विभिन्न गोदाममा समेत गएर अनुसन्धान गरेको थियो । विभागका अनुसार लामाले पौडेलसँग आफू सम्पर्कमा रहेको स्वीकार गरेका छन्।
