मनाङमा पनि देखियो लम्पी स्किन रोग

हाम्रो हेडलाइन संवाददाता
लमजुङ । मनाङका किसानहरुले पालेका पशुमा लम्पी स्किन रोग देखिएको छ । मनाङमा लम्पी स्किन रोगले एउटा गोरु बिरामी परेको छ। मनाङको चामे गाउँपालिका–२ थान्चोकका किसानको घरमा पालेको गोरुमा लम्पी स्किन रोग पुष्टि भएको छ। पशु चिकित्सकका अनुसार लामखुट्टे, झिंगा, किर्नाको टोकाइबाट यो रोग एकअर्का पशुमा सर्छ। त्यस्तै संक्रमित पशुको लसपसबाट पनि यो रोग एकअर्कामा सर्ने गर्छ।
भेटेरिनरी अस्पताल तथा पशुसेवा केन्द्र मनाङका पशु चिकित्सक नारायण कुसुमका अनुसार मनाङमा बिरामी परेको गोरु मोटरबाटो नजिकको घरको हो। घर नजिकैको मोटरबाटो हुँदै दिनमा ६०–७० वटा सवारी लम्जुङ आउजाउ गर्छन। त्यही क्रममा गाडी चढेर उक्लिएका झिंगा, लामखुट्टे मार्फत हिमाली जिल्लासम्म रोग उक्लेको अनुमान छ।
जिल्लामा पहिलो पटक पशुमा लम्पी स्किन देखिएपटि आसपासका क्षेत्रका स्वस्थ पशुमा रोगविरुद्धको खोप लगाउने तयारी भएको उनले बताए। मनाङमा मात्र पशुका लागि भनेर लम्पी स्किन विरुद्धको २ हजार डोज खोप लगिएको उनले बताए। जिल्लामा करिब १५ सय गाइगोरु रहेको अनुमान छ।