काठमाडौं । सहकारी ठगीको अभियोगमा पक्राउ परेकी कांग्रेस सांसद माया राईविरुद्ध दुई सातामै प्रहरीले अनुसन्धान सकेर मुद्दा दायर गरेको छ। गत १३ वैशाखमा पक्राउ परेकी उनीविरुद्ध मंगलबार जिल्ला अदालत, काठमाडौंमा मुद्दा दायर भएको हो।
उनीविरुद्ध ठगीका साथै संगठित अपराधको कसुरसमेत लगाइएको छ। जबकि संगठित अपराधको कसुरमा ६० दिनसम्म थुनामा राखेर अनुसन्धान गर्न सकिने प्रावधान भए पनि राईको हकमा भने प्रहरीले दुई सातामै सकाएको हो। फौजदारी मुद्दाको अनुसन्धान र अभियोजनमा स्वेच्छाचारिता बढेको भनेर आलोचना भइरहेका वेला राईमाथि प्रहरीले छिटो अनुसन्धान प्रतिवेदन बुझाएको हो।
उनीविरुद्ध ८ महिनाअघि नै पक्राउ पुर्जी जारी भएको थियो। तर, सत्ताको संरक्षणमा प्रहरीले पक्राउ गर्न सकेको थिएन। सर्वत्र प्रश्न उठेपछि प्रहरीले दुई साताअघि पक्राउ गरेको हो। उनी सहकारीको सञ्चालक भएको अवस्थामा २ करोड ४० लाख ४४ हजार मात्र हिनामिना भएको भन्दै सोहीअनुसार उनीविरुद्ध मागदाबी लिइएको छ।
