काठमाडौं । नेपाल सरकारले चन्द्रकुवेर खापुङलाई नेपाल प्रहरीको नयाँ महानिरीक्षक (आईजीपी) मा नियुक्त गरेको छ। शुक्रबार बसेको मन्त्रिपरिषद् बैठकले भदौ १९ गतेदेखि लागू हुने गरी उनलाई ३२औँ प्रहरी प्रमुख बनाउने निर्णय गरेको हो।
हालका प्रहरी महानिरीक्षक दीपक थापा भदौ १८ गते राति १२ बजेदेखि अनिवार्य अवकाशमा जाने भएका छन्। प्रधानमन्त्री केपी शर्मा ओलीको चीन भ्रमणअघि नै सरकारले नयाँ प्रहरी नेतृत्व टुंगो लगाएको हो।
खापुङ हाल प्रहरीको केन्द्रीय अनुसन्धान ब्यूरो (सिआइबी) का प्रमुखका रूपमा कार्यरत छन्। उनी र अवकाशमा जान लागेका आईजीपी थापा एकै ब्याचका अधिकृत हुन्। दुवै जनाले २०५१ साल चैत ५ गते इन्स्पेक्टरका रूपमा प्रहरी सेवामा प्रवेश गरेका थिए।
तीन चरणमा इन्स्पेक्टर पदमा नियुक्ति पाएका सोही ब्याचका अधिकृतमध्ये खापुङ अन्तिम लट्का हुन्। उनीसँगै नियुक्त भएका एआईजी लालमणि आचार्य र कृष्णहरि शर्मा पोखरेल उमेर हदम्यादका कारण अवकाशको प्रक्रियामा रहेकाले खापुङ आईजीपी पदका एकल प्रतिस्पर्धी बनेका हुन्।
यदि खापुङको कार्यकालमा नयाँ प्रहरी ऐन लागू भएमा उनले हालको प्रावधानअनुसार अतिरिक्त ६ महिना कार्यकाल थप गर्न सक्ने सम्भावना छ। तर, नयाँ ऐन लागू नभए ३० वर्षे सेवा अवधिका आधारमा उनी आगामी कात्तिक २६ गते अनिवार्य अवकाशमा जानुपर्नेछ।
