राष्ट्रियसभा निर्वाचनको प्रतिवेदन राष्ट्रपतिलाई बुझाइयो

काठमाडौं । माघ ११ गते सम्पन्न राष्ट्रियसभा निर्वाचनको प्रतिवेदन राष्ट्रपति रामचन्द्र पौडेललाई बुझाइएको छ । प्रतिवेदन आयोगका प्रमुख निर्वाचन आयुक्त दिनेशकुमार थपलियाले आइतबार राष्ट्रपति निवास पुगेर पौडेललाई बुझाएका हुन् ।
यसैबीच प्रमुख निर्वाचन आयुक्त थपलियाले मौनअवधिमा विराटनगरमा आयोजित चियापानलाई लिएर असन्तुष्टि व्यक्त गरेका छन् । सत्तारूढ गठबन्धन र विपक्षी गठबन्धनले माघ १० गते बिहान चियापान आयोजना गरेका थिए । जबकी ८ गते राति १२ बजेबाटै मौनअवधि सुरू भएको थियो । यस विषयलाई लिएर थपिलयाले असन्तुष्टि व्यक्त गरेका हुन् ।
यस्तै उनले राष्ट्रियसभा निर्वाचनमा कतिपय जनप्रतिनिधिले मताधिकारको प्रयोग नगरेकोमा पनि गुनासो गरे । निर्वाचनमा काठमाडौं महानगरपालिकाका प्रमुख बालेन शाह, धरान उपमहानगरपालिका प्रमुख हर्क साम्पाङ र धनगढी उपमहानगरपालिकाका प्रमुख गोपाल हमालले राष्ट्रिय सभा निर्वाचनमा मतदान गरेका थिएनन् ।