काठमाडौं । सर्वोच्च अदालतमा तीन जना नयाँ न्यायाधीश नियुक्त भएका छन्। राष्ट्रपति रामचन्द्र पौडेलले सोमबार न्याय परिषद्को सिफारिसको आधारमा तीन न्यायाधीश नियुक्त गरेका हुन्।
नियुक्त हुनेहरूमा वरिष्ठ अधिवक्ता मेघराज पोखरेल, उच्च अदालत जनकपुरका मुख्य न्यायाधीश श्रीकान्त पौडेल र उच्च अदालत दिपायलका मुख्य न्यायाधीश शान्तिसिंह थापा रहेका छन्।
राष्ट्रपति कार्यालयकी प्रवक्ता शैलजा रेग्मी भट्टराईका अनुसार, नेपाल संविधानको धारा १२९ को उपधारा (२) बमोजिम राष्ट्रपति पौडेलले उनीहरूलाई नियुक्त गरेका हुन्।
नयाँ नियुक्त न्यायाधीशहरूको शपथ ग्रहण छिट्टै सम्पन्न हुने अपेक्षा गरिएको छ। न्याय क्षेत्रमा लामो समयदेखि सक्रिय अनुभव भएका व्यक्तिहरूलाई सर्वोच्च अदालतमा नियुक्त गरिएको भन्दै न्यायिक वृत्तमा यसलाई सकारात्मक रूपमा हेरिएको छ।
