काठमाडौं । रसुवाको भोटेकोशीसहित आसपासका जिल्लामा आएको विनाशकारी बाढीमा परी हालसम्म १ हजार ३ सय ५५ जनाको मृत्यु भएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार भदौ २२ गते बिहान ११ बजेसम्म विभिन्न जिल्लामा ती शव फेला परेका हुन्।
प्राधिकरणका अनुसार सबैभन्दा बढी चितवनमा ३ सय ६३ जनाको शव फेला परेको छ। नवलपरासी पूर्वमा २ सय २२, नवलपरासी पश्चिममा २ सय २१, नुवाकोटमा १ सय ९७, रसुवामा १ सय ६९, गोरखामा ७५, धादिङमा ७० र तनहुँमा ३८ जनाको शव फेला परेको छ। फेला परेका शवमध्ये हालसम्म ९८ जनाको मात्रै सनाखत भएको छ।
बाढीपछि ४ हजार ९ सय ९६ जना सम्पर्कविहीन रहेको प्राधिकरणले जनाएको छ। सम्पर्कविहीनको सूचीमा उद्धार भइसकेका तर सनाखत हुन बाँकी व्यक्ति पनि पर्न सक्ने भएकाले तथ्याङ्क रुजु भइरहेको जनाइएको छ।
उद्धारतर्फ हालसम्म १३ हजार ३ सय ९६ जनालाई सुरक्षित स्थानमा सारिएको छ। बाढीमा परी घाइते भएका ६ हजार ६ सय ७२ जनाको उपचार गरिएकोमा २ सय २८ जना डिस्चार्ज भएका छन् भने ३ सय २३ जनाको विभिन्न अस्पतालमा उपचार भइरहेको छ।
खोज तथा उद्धारका लागि नेपाली सेना, नेपाल प्रहरी र सशस्त्र प्रहरी गरी २१ हजार ४ सय २ जना सुरक्षाकर्मी परिचालन गरिएको छ। रसुवा, नुवाकोट र धादिङका ३९ वटा होल्डिङ सेन्टरमा अहिले ३ हजार ५ सय ३३ जना आश्रित रहेको प्राधिकरणले जनाएको छ।
प्रभावित क्षेत्रमा स्वास्थ्य मन्त्रालयले १ सय ५० जना स्वास्थ्यकर्मी र २९ जना मनोसामाजिक परामर्शदाता परिचालन गरेको छ। उद्धार तथा राहतका लागि नेपाली सेनाबाट १ हजार १ सय ५७, सशस्त्र प्रहरीबाट १ सय ९३ र निजी हेलिकप्टरबाट १ सय २९ उडान भएका छन्।
यसैबीच प्रभावित जिल्लामा विद्युत् तथा सञ्चार सेवा क्रमशः सञ्चालनमा आएको छ। धादिङमा ९९.८ प्रतिशत, नुवाकोटमा ९६.७ प्रतिशत र रसुवामा ७८ प्रतिशत घरधुरीमा विद्युत् आपूर्ति सुचारु भएको छ। नेपाल टेलिकमका १२० मध्ये ११७ र एनसेलका ७८ मध्ये ७६ टावर सञ्चालनमा आएका छन्।
सरकारले रसुवा र नुवाकोटलाई १–१ करोड तथा धादिङलाई ५० लाख रुपैयाँ राहत उपलब्ध गराएको छ। प्रभावित १५ पालिकाका लागि कुल १३ करोड ५० लाख रुपैयाँ विनियोजन गरिएको छ।
प्रभावित क्षेत्रमा इन्धन आपूर्ति सहज बनाउन ५८ हजार लिटर डिजेल, २५ हजार लिटर पेट्रोल र १३ हजार लिटर हवाई इन्धन मौज्दात राखिएको छ भने ४ सय ५७ वटा ग्यास सिलिन्डर अनुदानमा पठाइएको छ।
प्राधिकरणले बेपत्ता, घाइते तथा उद्धार गरिएका व्यक्तिहरूको विवरण आधिकारिक फेसबुक पेज र वेबसाइटमार्फत अद्यावधिक भइरहेको जनाएको छ।
