काठमाडौं । नेपाली कविताका शिखरपुरुष भूपी शेरचनबारे संस्मरण भूपी : छोरीको स्मृतिमा प्रकाशन भएको छ । भूपी शेरचनकी कान्छी छोरी कविता शेरचनले उक्त पुस्तक लेखेकी हुन् । यो पुस्तक भूपी : अ डटर्स मेम्वाएरको नेपाली अनुवाद हो ।
आधुनिक नेपाली कविताका सर्वोच्च शिखर कवि भूपी आज पनि उत्तिकै आदरपूर्वक पढिन्छन् । कवितामा मानवीय संवेदनाको सार पर्गेल्दै सामाजिक न्यायको पक्षपोषण गर्ने उनको जीवन भने विरोधाभास र रहस्यमै बित्यो । कम्युनिस्ट आदर्श अँगालेका उनले विलासी र रवाफिलो जीवनशैली अपनाए ।
लेखक कविता भन्छिन्, ‘कवि भूपी शेरचनबारे मैले अनेकौं किस्सा सुनेकी छु । केही सत्य तर धेरै कपोलकल्पित ! तिनै किस्साहरूलाई मैले पुस्तकमार्फत रहस्योद्घाटन गर्ने प्रयास गरेको छु ।’
नयाँ नेपाली पाठकलाई नेपाली साहित्यका महान् व्यक्तित्वबारे जानकारी गराउने र उनीहरूमा हाम्रा साहित्यिक सम्पदाप्रति श्रद्धा जगाउने प्रयासस्वरुप शृङ्खलाबद्ध रूपमा आफूहरूले ती व्यक्तित्वहरूबारे संस्मरण एवम् जीवनी प्रकाशन गर्दै आएको प्रकाशक फाइनप्रिन्टका प्रमुख कार्यकारी अधिकृत (सिइओ) नीरज भारीले बताए । ‘त्यही शृङ्खलाअन्तर्गत हामीले भूपी : छोरीको स्मृतिमा प्रकाशन गरेका हौं । यसअघि हामीले गोविन्द गिरी प्रेरणाले लेखेको पारिजातको जीवनी सुश्री पारिजात र लक्ष्मीप्रसाद देवकोटाबारे छोरा पद्म देवकोटाले लेखेको संस्मरण सम्झनामा बुबा लक्ष्मीप्रसाद देवकोटा प्रकाशन गरेका छौं ।’
