सय किलो सुन प्रकरणः सोह्रखुट्टे र कमलपोखरी गोदाममा राजस्वको छापा

काठमाडौं । राजस्व अनुसन्धान विभागको टोलीले बरामद गरेको एक अर्ब बराबरको सुनसँग जोडिएको प्रकरणमा एक गोदाममा छापा मारेको छ। आज दिउँसो कमलपोखरीमा रहेको गोदाममा छापा राजस्वको टोलीले छापा मारेको हो।
गत बुधबार त्रिभुवन विमानस्थलको भन्सार कार्यालयबाट जाँच पास भएर बाहिरिएको सुन प्रकरणमा संलग्न व्यक्तिले गोदाममा सुन राखेको सूचना पाएपछि छापा मारिएको हो। यसअघि विभागको टोलीले पक्राउ परेका व्यक्तिहरु बस्ने र सामान राख्ने लाजिम्पाट र बालुवाटारमा पनि छापा मारेको थियो। राजस्व अनुसन्धानले अहिलेसम्म सुन प्रकरणमा १७ जनालाई पक्राउ गरेको छ। बिहीबार दिउँसो विभागको टोलीले थप एक जनालाई पक्राउ गरेको जनाएको छ।
यसैबीच राजस्व अनुसन्धान विभागको टोलीले रेडी ट्रेडर्सले ल्याएको सामान राख्ने अर्को गोदाममा पनि छापा मारेको छ।
सोह्रखुट्टेमा ‘ब्रेक शु’ राख्नको लागि लिएको गोदामा छापा मारेको हो। बिदेशबाट ल्याएको ‘ ब्रेक शु’भित्रको सुन निकालेर त्यहाँबाट अरुतिर लैजाने जानकारी पाएपछि विभागले छापा मारेको हो। गोदामाबाट ५५ वटाभन्दा बढी कार्टुन बरामद गरिएको हो। तर त्यहाँभित्र सुन भए नभएको पुष्टि भएको छैन।