लमजुङको खुदीबाट ३ सय ९० किलो सुनगाभासहित २ जना पक्राउ

काठमाडौं । लमजुङ प्रहरीले अवैध जडिबुटी ओसारपोसारको आरोपमा जीपसहित २ जनालाई पक्राउ गरेको छ । उनीहरुको साथबाट ३ सय ९० किलो सुनगाभा बदामद गरेको प्रहरीले जनाएको छ ।
प्रहरीले शनिबार बिहान ९ बजेतिरको समयमा प्रहरी नायव निरीक्षक प्रेमप्रसाद शर्माको नेतृत्वमा खटिएको ३ जनाको प्रहरी टोलीले प्रहरी बिटमा नियमित चेकजाँच गर्ने क्रममा जिपमा ढुवानी गर्दै बेंसीशहरतिर लैजाँदै गरेको सुनगाभा फेला परेको प्रहरीले बताएको छ ।
प्रहरीले मस्र्याङ्दी गाउँपालिका ३ का ४१ वर्षीय जगरबहादुर गुरुङले चलाएको ग१ज ६६५७ नम्बरको बलेरो जीपमा दुवानी गरी ल्याएको सुनगाभा ३ सय ९० किलो फेला पारेको र उक्त जडिबुटी ओसारपसारमा संलग्न मस्र्याङ्दी गाउँपालिका ४ का ३९ वर्षीय श्रीप्रसाद लामालाई प्रहरीले पक्राउ गरेको हो ।
जिल्ला प्रहरी कार्यालयका सूचना अधिकारी प्रहरी निरीक्षक थानेश्वर चपाइँले जिप, बरामद गरिएको सुनभागा, चालक र ओसारपसारमा संलगन व्यक्तिलाई अन्नपूर्ण संरक्षण क्षेत्र आयोजना (एक्याप) इलाका संरक्षण कार्यालय भुजुङसंग आवश्यक समन्वय गरी पोखरा पठाएको बताए ।