क्व्होलासोथार जोड्ने मिदिमखोलामाथि मोटरेवल पुल उद्घाटन

काठमाडौं । लमजुङको क्व्होलासोथार गाउँपालिका २ मालिङक्षेत्र र वडा नं. ८ घाम्राङबेंसी जोड्न मिदिमखोला माथि निर्माण गरिएको मोटरेवल पुलको उद्घाटन गरिएको छ । गण्डकी प्रदेशका संस्थापक मुख्यमन्त्री पृथ्वीसुब्बा गुरुङले आफू मुख्यमन्त्री रहँदा २०७६ माघ १० गते शिलान्यास गरेका पुल निर्माणकार्य सकिएसंगै उनले नै सोमबार उद्घाटन गरे ।
पुल उद्घाटन कार्यक्रमलाई सम्बोधन गर्दै उनले आफूले शिलान्यास गरेका कतिपय योजनाहरु अहिले पनि नसक्नु वर्तमान सरकारको कमजोरी भएको टिप्पणी गरे ।
गण्डकी प्रदेश सभा सदस्य पार्वती तामाङले गाउँठाउँको विकास विस्तारै भइरहेको भन्दै विकास निर्माणमा सवै एकजुट हुन आवश्यक रहेको बताइन् ।
हिम सगरमाथा–पराजुली जेभीले २ वर्षमा सक्ने गरी भ्याटसहित ७ करोड ७८ लाख ९७ हजार ८ सय ७२ रुपैयाँ १६ पैसामा सम्झौता गरेको पुल ७ करोड ४९ लाख ५७ हजार ४ सय ६८ रुपैयाँ ९१ पैसामा निर्माण सकेको गाउँपालिकाका प्रमुख प्रशासकीय अधिकृत माधवप्रसाद वाग्लेले बताए । २०७८ पुस १८ गते सक्ने गरी २०७६ पुस १८ गते सम्झौता गरेकोमा ६ महिना म्याद थपेर २०७९ असार ११ गते निर्माण सकेको हो । यो पुल पूर्वाधार विकास कार्यालयमार्फत निर्माण भएको हो । भारबहन सडक ६ मिटर चौडाई र ७४ दशमलब १५ मिटर लम्बाईको पुलको भारबहन क्षमता ५० टन रहेको छ ।
क्व्होलासोथार गाउँपालिका अध्यक्ष सूर्यप्रसाद गुरुङले पुल उद्घाटनको अध्यक्षता ग्रहण गर्दै मोटरेवल पुलले हालसम्म मिदिम पारी र मिदिम वारी भनिँदै आएकोमा त्यो अवस्थाको अन्त्य भएको बताए ।