काठमाडौं । प्रविधि कम्पनी एप्पलले नयाँ आईफोन थैली ‘आईफोन पकेट’ सार्वजनिक गरेको छ। कम्पनीले मंगलबार यो हाते थैलीको मूल्य २३० अमेरिकी डलर (करीब ३२ हजार ५ सय रुपैयाँ) तोकेको छ। आजदेखि यो अमेरिका, फ्रान्स, चीन, इटाली, जापान, सिङ्गापुर, दक्षिण कोरिया र बेलायतमा उपलब्ध भएको छ।
सामाजिक सञ्जालमा यो थैलीको अत्यधिक मूल्य र सामान्य डिजाइनलाई लिएर चर्को आलोचना भइरहेको छ। प्रयोगकर्ताहरूले यसलाई काटिएको मोजा जस्तो भएको भन्दै मजाक उडाएका छन्। टेक युट्युबर मार्कस ब्राउनलीले यसलाई एप्पल फ्यानको ‘वफादारी परीक्षण’ भनेका छन्।
एप्पलका अनुसार, यो थैली जापानी फेसन लेबल ‘इसे मियाके’ सँगको सहकार्यमा सीमित संस्करणका रूपमा तयार पारिएको हो। कम्पनीले भन्यो कि उत्पादनको अवधारणा ‘एउटा अतिरिक्त पकेट बनाउने सोच’ बाट आएको हो। थैली आठ रंगमा र तीन फित्ता भेरियन्टमा उपलब्ध छ।
सामाजिक सञ्जालमा धेरैले यसको खुला मुख, मोजा जस्तो बनावट र सुरक्षा कमीलाई लिएर प्रश्न उठाएका छन्। केहीले भने सहकार्य र ब्रान्डिङका कारण यसको मूल्य उच्च भएको बचाउ गरेका छन्।
विश्लेषक म्याट नभाराले बीबीसीलाई भने, लक्जरी फेसन र डिजाइनर सहकार्यमा यस्तो मूल्य सामान्य रहेको छ, तर अधिकांश उपभोक्ताका लागि एप्पल ब्रान्डप्रतिको वफादारीको सीमा परीक्षण जस्तो देखिन्छ।
