‘पाँच पाण्डव’को गीत ‘दाजु भाइजस्ता हुँदैनन् अरु’ सार्वजनिक

काठमाडौं । कात्तिक २० गतेदेखि प्रदर्शनमा आउने तयारीमा रहेको नेपाली चलचित्र ‘पाँच पाण्डव’को गीत ‘दाजु भाइजस्ता हुँदैनन् अरु’ सार्वजनिक भएको छ । निर्माण टिमले बुधबार दाजुभाइबीचको मिलन, भ्रातृत्व र एकताको भाव समेटिएको गीत सार्वजनिक गरेको हो । सत्यराज आचार्य र स्वरुपराज आचार्यको स्वर रहेको गीतमा डा. कृष्णहरि बरालको शब्द तथा अर्जुन पोखरेलको संगीत रहेको छ । गीतले दाजुभाइबीचको सम्बन्ध, आपसी विश्वास र एकताको महत्त्वलाई प्रस्तुत गरेको छ । गीतको भिडियोमा स्वर्गलोकका युधिष्ठिर धर्तीमा रहेका आफ्ना भाइहरू समस्यामा परेको थाहा पाएपछि उनीहरूको खोजी गर्दै आएको देखाइएको छ । चलचित्रको कथावस्तुको भाव बुझ्नसमेत सहयोग गर्ने गीतले भाइभाइबीचको एकतामा रहेको शक्ति र त्यसको अर्थलाई प्रस्तुत गर्ने प्रयास गरेको छ । ‘पाँच पाण्डव’ दाजुभाइबीचको सम्बन्धमा आधारित चलचित्र हो । गीतको भिडियोमा चलचित्रका मुख्य कलाकार हरिवंश आचार्य, जितु नेपाल, आर्यन सिग्देल, महेश त्रिपाठी र सुशील सिटौला देखिएका छन् । भिडियोमा गम्भीर विष्टको कोरियोग्राफी, श्याम तामाङको छायांकन र सुप्रिम पराजुलीको सम्पादन रहेको छ । गीतको अन्तिममा द्रौपदीको भूमिकामा इभा गिरी देखिएकी छन् । बसन्त निरौलाको निर्देशनमा बनेको चलचित्र काली रानी फिल्मस्को ब्यानरमा निर्माण भएको हो । चलचित्रमा दर्शकले डल्बी एटमस साउन्डको अनुभव लिन पाउने निर्माण टिमले जनाएको छ । चलचित्रमा हरिवंश आचार्य, जितु नेपाल, आर्यन सिग्देल, महेश त्रिपाठी र सुशील सिटौला मुख्य पाँच पाण्डवको भूमिकामा छन् । त्यस्तै, दीपाश्री निरौला, सरिता गिरी, विनोद न्यौपाने, रमा थपलिया, प्रशान्त ताम्राकार, इभा गिरी, सीता न्यौपाने र रितेश पौडेल (रितेशजंग खत्री) लगायतका कलाकारको पनि अभिनय रहेको छ । चलचित्रका प्रस्तुतकर्ता नवीन श्रेष्ठ हुन् भने निर्माता काली रानी श्रेष्ठ हुन् । नवीन श्रेष्ठले यसअघि गत वर्ष चलचित्र ‘लाज शरणम्’ निर्माण गरेका थिए । ‘पाँच पाण्डव’को कथा, पटकथा तथा संवाद सुशील पौडेलले लेखेका हुन् । लेखक पौडेलका अनुसार यो चलचित्र ‘सोसल ड्रामा’ अर्थात् सामाजिक कथामा आधारित चलचित्र हो । महाभारतका पाँच पाण्डवका चरित्र र विम्बलाई प्रयोग गर्दै समकालीन नेपाली समाजको कथा प्रस्तुत गर्नु चलचित्रको उद्देश्य रहेको उनले बताएका छन् । तिहारको अवसर पारेर चलचित्र कात्तिक २० गते (नोभेम्बर ६) देखि प्रदर्शनमा आउने तयारीमा छ ।