काठमाडौं । प्रधानमन्त्री केपी शर्मा ओलीको चीन भ्रमण मन्त्रिपरिषद्ले स्वीकृत गरेको छ। शुक्रबार प्रधानमन्त्रीको सरकारी निवास बालुवाटारमा बसेको मन्त्रिपरिषद् बैठकले भदौ १४ देखि १८ गतेसम्म हुने चीन भ्रमणलाई स्वीकृति दिएको सरकारका प्रवक्तासमेत रहेका सञ्चार तथा सूचना प्रविधिमन्त्री पृथ्वीसुब्बा गुरुङले जानकारी दिए।
प्रधानमन्त्री ओली शनिबार चीन प्रस्थान गर्दैछन्। उनले सांघाइ सहयोग संगठन (एससीओ)को शिखर सम्मेलनमा भाग लिने कार्यक्रम रहेको छ। भ्रमणका क्रममा ओलीले चीनका राष्ट्रपति सी चिनफिङ र उपराष्ट्रपति हान झेङसँग छुट्टाछुट्टै भेटवार्ता गर्ने तय भएको छ।
त्यस्तै, प्रधानमन्त्री ओलीले सेप्टेम्बर १ मा तियानजिनमा आयोजना हुने ‘एससीओ प्लस समिट’ लाई सम्बोधन गर्नेछन्। शिखर सम्मेलनको अवसरमा सहभागी अन्य विश्व नेताहरूसँग पनि उनको भेटवार्ता तय भएको परराष्ट्र मन्त्रालयले जनाएको छ।
जापानी उपनिवेशविरुद्ध चीनले हासिल गरेको विजयको ८० औँ वार्षिकोत्सवका अवसरमा बेइजिङमा आयोजना हुने सैन्य परेडमा समेत प्रधानमन्त्री ओली सहभागी हुने कार्यक्रम रहेको छ।
प्रधानमन्त्रीको भ्रमण टोलीमा उनकी श्रीमती राधिका शाक्य, शिक्षा, विज्ञान तथा प्रविधिमन्त्री रघुजी पन्त, संस्कृति, पर्यटन तथा नागरिक उड्डयनमन्त्री बद्रीप्रसाद पाण्डे, नेपाली कांग्रेस उपसभापति पूर्णबहादुर खड्का, प्रधानमन्त्रीका आर्थिक तथा विकास सल्लाहकार डा. युवराज खतिवडा, एमाले सांसद छविलाल विश्वकर्मा लगायत उच्चपदस्थ अधिकारी रहनेछन्।
प्रधानमन्त्री ओलीको टोली भदौ १८ गते स्वदेश फर्किनेछ।
