मध्यपुरथिमिमा बिस्केट जात्राका लागि चार दिन सार्वजनिक बिदा

काठमाडौं । मध्यपुरथिमि नगरपालिकाले चार दिन सार्वजनिक बिदा दिएको छ । नगरपालिकाले नयाँ वर्षमा मनाइने ऐतिहासिक एवम् सांस्कृतिक महत्त्वको बिस्काः अर्थात् बिस्केट जात्राका लागि आजदेखि चार दिन सार्वजनिक बिदा दिने निर्णय गरेको हो ।
नगरपालिकाका उपमेयर विजयकृष्ण श्रेष्ठले आजदेखि वैशाख ३ गतेसम्म सार्वजनिक बिदा दिने निर्णय गरिएको जानकारी दिनुभयो । हरेक नयाँ वर्षमा मध्यपुरथिमिमा भव्यरूपमा बिस्केट जात्रा मनाइन्छ । स्थानीय बासिन्दाका लागि यो ठूलो चाड हो । विस्केट जात्रालाई विशेषगरी भक्तपुर जिल्लाभरिमा नेवार समुदायले दशैँभन्दा ठूलो चाडका रूपमा मनाउने गर्दछन् ।