चर्कियो बैंकविरुद्धको आन्दोलन, बैंकका शाखाहरुमा तालाबन्दी

काठमाडौं । सुदूरपश्चिमका उद्योगी–व्यवसायीहरुले बैंक तथा वित्तीय संस्थाविरुद्ध प्रदर्शन चर्काएका छन्।
कैलाली उद्योग वाणिज्य संघको आयोजनामा भइरहेको चरणबद्ध विरोध कार्यक्रमअन्तर्गत आज उद्योगी–व्यवसायीहरुले धनगढीमा रहेका बैंकका शाखाहरुमा ‘नो डिपोजिट’ लेखिएको ब्यानर टासेर तालाबन्दी गरेका छन्। बैंकहरुले मनोमानी रुपमा ब्याजदर बढाएको भन्दै सुदूरपशिचमका उद्योगी–व्यवसायीले ‘व्यवसायीमाथिको आतंक बन्द गर’, ‘बैंकको ब्याजदरमा एकरुपता कायम गर’, ‘व्यवसायीमाथिको व्यापार बन्द गर’लगायतका नारा गराउँदै उनीहरुले तालाबन्दी गरेका हुन् ।
बैंकको ब्याजदर तथा विभिन्न नीतिविरुद्ध भइरहेको आन्दोलनमा सुदूरपश्चिमका सबै जिल्ला तथा नगर उद्योग वाणिज्य संघको ऐक्यबद्धता रहेको कैलाली उद्योग वाणिज्य संघका अध्यक्ष पुष्पराज कुँवरले बताए।